Poetry آج کے منتخب اشعار

[master007]

تھی جتنی بساط ، کی پرستِش
تم بھی تو کوئی خُدا نہیں تھے

احمد فراز​​

 

[master007]

پھر بے نوا حیات کے ویران دوش پر​
بل کھا رہی ہے گیسوئے عنبر فشاں کی یاد​
​
پھر ریگزارِ سندھ کی تپتی زمین پر​
گنگا کو لے کر آئی ہے ہندوستاں کی یاد​
​
جوش ملیح آبادی​​​

 

[master007]

پُہونْچے ہیں ہم کو عِشق میں آزار ہر طرح
ہوتے ہیں ہم سِتم زدہ بِیمار ہر طرح

ترکیب و طرح ناز و ادا سب سے دل لگے
اُس طرحدار کے ہیں گرفتار ہر طرح

میر تقی میر​​

 

[master007]

اشک آنکھوں میں کب نہیں آتا ​
لہو آتا ہے جب نہیں آتا​
​
صبر تھا ایک مونسِ ہجْراں ​
سَو، وہ مدّت سے اب نہیں آتا​
​
میر تقی میر​​​

 

[master007]

گُزر گئے ہیں جو خوشبوئے رائیگاں کی طرح !​
وہ چند روز، مِری زندگی کا حاصل تھے​
​
ناصرکاظمی ​​​

 

[master007]

دشت سے قلزمِ خُوں تک کی مسافت ہے فراز
قیس سے غالبِ آشفتہ نوا ہونے تک

احمد فراز​​

 

[master007]

نغمہ ہائے غم کوبھی، اے دل! غنیمت جانیے
بے صدا ہو جائے گا یہ سازِ ہستی ایک دن

دَھول دَھپّا اُس سراپا ناز کا شیوہ نہیں
ہم ہی کر بیٹھے تھے، غالب! پیش دستی ایک دن

مرزا غالب​​

 

[master007]

منظُور تھی یہ شکل، تجلّی کو نُور کی
قسمت کھُلی تِرے قد ورُخ سے ظہُور کی

گو واں نہیں، پہ واں سے نِکالے ہوئے تو ہیں
کعبہ سے اِن بُتوں کو بھی نسبت ہے دُور کی

مرزا غالب​​

 

[master007]

واعظ ! نہ تم پیو، نہ کسی کو پِلا سکو
کیا بات ہے تُمھاری شرابِ طہُور کی

مرزا غالب​​

 

[master007]

ہوگا کوئی ایسا بھی کہ غالب کو نہ جانے
شاعِر تو وہ اچھا ہے، پہ بدنام بہت ہے

مرزا غالب​​