امجد اسلام امجد

[alone_leo82]

کب سے ہم لوگ اس بھنور میں ہیں​

امجد اسلام امجد​

​

کب سے ہم لوگ اس بھنور میں ہیں ​

​

اپنے گھر میں ہیں یا سفر میں ہیں ​

​

یوں تو اڑنے کو آسماں ہیں بہت ​

​

ہم ہی آشوب بال و پر میں ہیں ​

​

زندگی کے تمام تر رستے ​

​

موت ہی کے عظیم ڈر میں ہیں ​

​

اتنے خدشے نہیں ہیں رستوں میں ​

​

جس قدر خواہش سفر میں ہیں ​

​

سیپ اور جوہری کے سب رشتے ​

​

شعر اور شعر کے ہنر میں ہیں ​

​

سایۂ راحت شجر سے نکل ​

​

کچھ اڑانیں جو بال و پر میں ہیں ​

​

عکس بے نقش ہو گئے امجدؔ ​

​

لوگ پھر آئنوں کے ڈر میں ہیں​

 

[Haris1234]

قائد اعظم​

امجد اسلام امجد​

​

آدم کی تاریخ کے سینے میں ڈوبے ہیں ​

​

کتنے سورج کتنے چاند ​

​

کیسے کیسے رنگ تھے مٹی سے پھوٹے ​

​

موج ہوا کے بنتے اور بگڑتے رستوں میں ٹھہرے ​

​

اور خاک ہوئے ​

​

نیلے اور اتھاہ سمندر کے ہونٹوں کی پیاس بنے ​

​

آنے والے دن کی آنکھوں میں لہراتی آس بنے ​

​

کیسے کیسے رنگ تھے جو مٹی سے چمکے ​

​

اور چمک کر پڑ گئے ماند ​

​

کچھ سورج ایسے پھر بھی ​

​

اپنی اپنی شام میں جو اس دشت افق کا رزق ہوئے ہیں ​

​

لیکن اب تک روشن ہیں گہنائے نہیں ​

​

پھول ہیں جن کو چھونے والی سبز ہوائیں خاک ہوئیں ​

​

لیکن اب تک تازہ ہیں کمہلائے نہیں ​

​

ایسا ہی اک سورج تھا وہ آدم زادہ ​

​

ٹوٹی اینٹوں کے ملبے سے جادہ جادہ ​

​

ٹکڑا ٹکڑا یکجا کر کے ​

​

ایک عمارت کی بنیادیں ڈال رہا تھا ​

​

سات سمندر جیسے دل میں ​

​

ان کے غم کو پال رہا تھا ​

​

جن کے کالے تنگ گھروں میں کوئی سورج چاند نہیں تھا ​

​

پھولوں کی مہکار نہیں تھی بادل کا امکان نہیں تھا ​

​

صبح کا نام نشان نہیں تھا ​

​

نیند بھری آنکھوں کے لان میں ​

​

وہ خود سورج بن کر ابھرا ​

​

ڈھلتی شب میں پورے چاند کی صورت نکلا ​

​

صبح کے پہلے دروازے پر دستک بن کر گونج اٹھا ​

​

آج میں جس منزل پر کھڑا ہوں ​

​

اس پر پیچھے مڑ کر دیکھوں ​

​

تو اک روشن موڑ پہ اب بھی ​

​

وہ ہاتھوں میں ​

​

آنے والے دن کی جلتی شمع تھامے ​

​

میری جانب دیکھ رہا ہے ​

​

جانے کیا وہ سوچ رہا ہے ​

Boht khoobsurat nazam phar kye maza a gya

 

[master007]

امجد اسلام امجد اک ایسے شاعر جنہوں نے اردو شاعری میں اپنی ایک الگ پہچان بنائی۔
بہت عمدہ۔

 

[amjad khan]

umdah

 

[tomy]

امجد اسلام امجد کی اعلیٰ کلیکشن ہے بہت خوب

 

[alone_leo82]

پلکوں کی دہلیز پہ چمکا ایک ستارا تھا​

امجد اسلام امجد​

​

پلکوں کی دہلیز پہ چمکا ایک ستارا تھا ​

​

ساحل کی اس بھیڑ میں جانے کون ہمارا تھا ​

​

کہساروں کی گونج کی صورت پھیل گیا ہے وہ ​

​

میں نے اپنے آپ میں چھپ کر جسے پکارا تھا ​

​

سر سے گزرتی ہر اک موج کو ایسے دیکھتے ہیں ​

​

جیسے اس گرداب فنا میں یہی سہارا تھا ​

​

ہجر کی شب وہ نیلی آنکھیں اور بھی نیلی تھیں ​

​

جیسے اس نے اپنے سر سے بوجھ اتارا تھا ​

​

جس کی جھلملتا میں تم نے مجھ کو قتل کیا ​

​

پت جھڑ کی اس رات وہ سب سے روشن تارا تھا ​

​

ترک وفا کے بعد ملا تو جب معلوم ہوا ​

​

اس میں کتنے رنگ تھے اس کے کون ہمارا تھا ​

​

کون کہاں پر جھوٹا نکلا کیا بتلاتے ہم ​

​

دنیا کی تفریح تھی اس میں ہمیں خسارا تھا ​

​

جو منزل بھی راہ میں آئی دل کا بوجھ بنی ​

​

وہ اس کی تعبیر نہ تھی جو خواب ہمارا تھا ​

​

یہ کیسی آواز ہے جس کی زندہ گونج ہوں میں ​

​

صبح ازل میں کس نے امجدؔ مجھے پکارا تھا​

 

[alone_leo82]

در کائنات جو وا کرے اسی آگہی کی تلاش ہے​

امجد اسلام امجد​

​

در کائنات جو وا کرے اسی آگہی کی تلاش ہے ​

​

مجھے روشنی کی تلاش تھی مجھے روشنی کی تلاش ہے ​

​

غم زندگی کے فشار میں تری آرزو کے غبار میں ​

​

اسی بے حسی کے حصار میں مجھے زندگی کی تلاش ہے ​

​

یہ جو سرسری سی نشاط ہے یہ تو چند لمحوں کی بات ہے ​

​

مری روح تک جو اتر سکے مجھے اس خوشی کی تلاش ہے ​

​

یہ جو آگ سی ہے دبی دبی نہیں دوستو مرے کام کی ​

​

وہ جو ایک آن میں پھونک دے اسی شعلگی کی تلاش ہے ​

​

یہ جو ساختہ سے ہیں قہقہے مرے دل کو لگتے ہیں بوجھ سے ​

​

وہ جو اپنے آپ میں مست ہوں مجھے اس ہنسی کی تلاش ہے ​

​

یہ جو میل جول کی بات ہے یہ جو مجلسی سی حیات ہے ​

​

مجھے اس سے کوئی غرض نہیں مجھے دوستی کی تلاش ہے​

 

[alone_leo82]

دشت دل میں سراب تازہ ہیں​

امجد اسلام امجد​

​

دشت دل میں سراب تازہ ہیں ​

​

بجھ چکی آنکھ خواب تازہ ہیں ​

​

داستان شکست دل ہے وہی ​

​

ایک دو چار باب تازہ ہیں ​

​

کوئی موسم ہو دل گلستاں میں ​

​

آرزو کے گلاب تازہ ہیں ​

​

دوستی کی زباں ہوئی متروک ​

​

نفرتوں کے نصاب تازہ ہیں ​

​

آگہی کے ہماری آنکھوں پر ​

​

جس قدر ہیں عذاب تازہ ہیں ​

​

زخم در زخم دل کے کھاتے میں ​

​

دوستوں کے حساب تازہ ہیں ​

​

سر پہ بوڑھی زمین کے امجدؔ ​

​

اب کے یہ آفتاب تازہ ہیں​

 

[alone_leo82]

نکل کے حلقۂ شام و سحر سے جائیں کہیں​

امجد اسلام امجد​

​

نکل کے حلقۂ شام و سحر سے جائیں کہیں ​

​

زمیں کے ساتھ نہ مل جائیں یہ خلائیں کہیں ​

​

سفر کی رات ہے پچھلی کہانیاں نہ کہو ​

​

رتوں کے ساتھ پلٹتی ہیں کب ہوائیں کہیں ​

​

فضا میں تیرتے رہتے ہیں نقش سے کیا کیا ​

​

مجھے تلاش نہ کرتی ہوں یہ بلائیں کہیں ​

​

ہوا ہے تیز چراغ وفا کا ذکر تو کیا ​

​

طنابیں خیمۂ جاں کی نہ ٹوٹ جائیں کہیں ​

​

میں اوس بن کے گل حرف پر چمکتا ہوں ​

​

نکلنے والا ہے سورج مجھے چھپائیں کہیں ​

​

مرے وجود پہ اتری ہیں لفظ کی صورت ​

​

بھٹک رہی تھیں خلاؤں میں یہ صدائیں کہیں ​

​

ہوا کا لمس ہے پاؤں میں بیڑیوں کی طرح ​

​

شفق کی آنچ سے آنکھیں پگھل نہ جائیں کہیں ​

​

رکا ہوا ہے ستاروں کا کارواں امجدؔ ​

​

چراغ اپنے لہو سے ہی اب جلائیں کہیں​

 

[alone_leo82]

ہوا ہی لو کو گھٹاتی وہی بڑھاتی ہے​

امجد اسلام امجد​

​

ہوا ہی لو کو گھٹاتی وہی بڑھاتی ہے ​

​

یہ کس گمان میں دنیا دیے جلاتی ہے ​

​

بھٹکنے والوں کو کیا فرق اس سے پڑتا ہے ​

​

سفر میں کون سڑک کس طرف کو جاتی ہے ​

​

عجیب خوف کا گنبد ہے میرے چار طرف ​

​

مری صدا مرے کانوں میں لوٹ آتی ہے ​

​

وہ جس بھی راہ سے گزرے جہاں قیام کرے ​

​

زمیں وہاں کی ستاروں سے بھرتی جاتی ہے ​

​

یہ زندگی بھی کہیں ہو نہ شہر زاد کا روپ ​

​

شبانہ روز کہانی نئی سناتی ہے​